Kuri uyu wa Mbere, tariki ya 18 Gicurasi 2026, Muhabura Integrated Polytechnic College yakiriye Komisiyo ya Sena ishinzwe Uburezi n’Ihame ry’Uburinganire mu ruzinduko rwari rugamije kureba no kuganira ku rwego rw’uburezi butangirwa mu mashuri y’ubumenyi ngiro ndetse n’uruhare rwabwo mu iterambere ry’urubyiruko n’igihugu muri rusange.

Muri uru ruzinduko, impande zombi zagiranye ibiganiro byibanze ku myigire y’abanyeshuri, ireme ry’uburezi ritangirwa mu mashuri y’ubumenyi ngiro, ndetse n’uburyo gahunda ya Student Internship ifasha abanyeshuri kubona ubumenyi ngiro bubategurira isoko ry’umurimo.

Komisiyo yanasuye ibikorwa bitandukanye bikorwa muri MIPC, harebwa kandi uruhare rw’igitsina gore mu kwitabira amashuri y’ubumenyi ngiro, hagamijwe gushimangira ihame ry’uburinganire no guteza imbere ubushobozi bw’abakobwa mu mashami y’imyuga n’ubumenyingiro.

Mu biganiro byabaye, MIPC yagaragaje zimwe mu mbogamizi amashuri y’ubumenyi ngiro ahura na zo mu gushyira mu bikorwa gahunda ya NST2, harimo ibijyanye no kubona aho abanyeshuri bimenyereza umwuga ndetse n’amafaranga asabwa bamwe mu banyeshuri mu gihe cya internship.

Ishuri kandi ryatanze ibisobanuro ku bufatanye rifitanye n’ibigo bitandukanye binyuze muri gahunda za Memorandum of Understanding (MOU), zifasha abanyeshuri kubona aho bakorera internship no kubona amahirwe yo kwimenyereza umwuga mu buryo bworoshye kandi bufite ireme.

Mu rwego rwo gukomeza guteza imbere uburezi bw’imyuga n’ubumenyingiro, hatanzwe ibitekerezo bitandukanye birimo:

1. Gushyiraho policy ikangurira abikorera bo muri PSF kugira uruhare rufatika mu guteza imbere uburezi.
2. Gushyiraho ibiciro ntarengwa by’amafaranga yishyurwa n’umunyeshuri usaba internship kugira ngo hirindwe ubusumbane n’imitwaro iremereye abanyeshuri.
3. Kunganira abanyeshuri mu bijyanye na internship, kuko ikiguzi cyayo gikomeje kuremerera bamwe mu babyeyi, bikaba byatuma hari abanyeshuri batabona amahirwe angana yo gukora neza stage zabo.

Ubuyobozi bwa MIPC bwashimiye Komisiyo ya Sena ku ruzinduko n’inama zatanzwe, bunashimangira ko ishuri rizakomeza guteza imbere ireme ry’uburezi, ubufatanye n’ibigo bitandukanye, ndetse no gushakira abanyeshuri amahirwe abafasha kugira ubumenyi n’ubushobozi bikenewe ku isoko ry’umurimo.