Ku Cyumweru tariki ya 07 Kamena 2026, muri Muhabura Integrated Polytechnic College (MIPC) i Musanze, habereye igikorwa cyo kuzamura abakarateka mu ntera (Karate Grading Ceremony 2026) cyateguwe na Ippon Warriors King Karate Do ndetse na MIPC Karate DO.

Iki gikorwa cyari kigamije gusuzuma urwego rwa tekiniki n’imyitwarire y’abakina Karate, hagamijwe kubazamura mu ntera (Passage) hashingiwe ku bushobozi bagaragaje mu myitozo n’isuzuma ryabateguriwe.

Muri rusange, abakarateka 38 ni bo bakoze ikizamini cyo kuzamurwa mu ntera. Abatsinze biteganyijwe ko bahabwa umukandara ujyanye n’urwego bagezeho, impamyabushobozi (Certificate) ndetse n’ikarita mpuzamahanga ya Isimbi Sports igaragaza ko ari abakarateka.

Bimwe mu byaranze iri suzuma

Abakarateka 2 bazamuwe bava ku mukandara w’icyatsi (Green Belt) bajya ku mukandara w’ubururu (Blue Belt).

Umukarateka 1 yazamuwe ava ku mukandara wa Orange ajya ku mukandara w’icyatsi (Green Belt).

Abakarateka 11 bagaragaje ubushobozi budasanzwe bazamurwa bava ku mukandara w’umweru (White Belt) bahita bagezwa ku mukandara wa Orange (Orange Belt) basimbutse urwego rw’umuhondo.

Abakarateka 24 bazamuwe bava ku mukandara w’umweru (White Belt) bajya ku mukandara w’umuhondo (Yellow Belt).

Ibi byagaragaje urwego rwiza rw’imyitozo, ubushake ndetse n’iterambere ry’abakina Karate muri Muhabura Integrated Polytechnic College (MIPC) no muri Ippon Warriors King Karate Do muri rusange.

Iki gikorwa kandi cyabaye umwanya mwiza wo guhuriza hamwe abayobozi, abatoza n’abakinnyi ba Karate kugira ngo bahigire indangagaciro zifasha kubaka igihugu, guteza imbere urubyiruko no kururinda ibibazo birimo ibiyobyabwenge, imyitwarire idahwitse ndetse n’izindi ngeso mbi.

Ku ruhande rwa MIPC Karate Do, ubuyobozi bwagaragaje ko intego nyamukuru ari ugutoza abanyeshuri ikinyabupfura, discipline n’imyitwarire myiza, kubaka ubuzima bwiza, kwigisha uburyo bwo kwirwanaho no gutegura ikipe ikomeye ihagararira neza (MIPC) mu bikorwa n’amarushanwa atandukanye.

MIPC Karate Do kandi ikomeje gushyira imbere gushyigikira uburezi, guteza imbere ubufatanye no kubaka abayobozi n’abanyeshuri bafite indangagaciro nziza, bityo siporo ya Karate ikaba umuyoboro wo guteza imbere ubushobozi, icyizere n’iterambere ry’urubyiruko.

Ubuyobozi bwitabiriye iki gikorwa bwashimangiye ko siporo ya Karate ifite uruhare rukomeye mu gufasha urubyiruko gukura rufite intego, kwigirira icyizere no kugira uruhare rugaragara mu kubaka u Rwanda rw’ejo hazaza.

MIPC Karate Do ikomeje guharanira kuba urubuga rutegura urubyiruko rufite discipline, ubushobozi n’indangagaciro zo kuba intangarugero muri society.